Samux rayonunda baş verən yol-nəqliyyat hadisəsi ilə əlaqədar sentyabrın 2-də saat 11:10 radələrində 7 nəfər (5 kişi, 2 qadın cinsli) Samux Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
Gencexeber.az-a bu barədə Tibbi Ərazi Bölmələrini İdarəetmə Birliyindən bildirilib. "Müxtəlif bədən xəsarətləri alan pasiyentlərə ilkin tibbi xidmət göstərilib. Onlar daha ixtisaslı tibbi xidmət almaq üçün Gəncə Şəhər Birləşmiş Xəstəxanasının nəzdindəki tibb müəssisələrinə təxliyə olunublar. Hazırda Akademik Z.Məmmədov adına xəstəxananın və Abbas Səhhət adına xəstəxananın Təcili tibbi yardım şöbələrində onların müayinələri davam etdirilir", - məlumatda deyilir.
13:03
Samux rayonunun Qaraağaclı qəsəbə sakini 1967-ci il təvəllüdlü Rafiq Behbudovun idarə etdiyi " VAZ 2107" markalı avtomobil Samux-Kür yolunun Sarıqamış kənd ərazisində hərəkətdə olarkən ötmə zamanı qarşıdan gələn "Hundai" markalı avtomobillə toqquşub.
Gencexeber.az-ın məlumatına əsasən, hadisə nəticəsində sürücü Rafiq Behbudov vəfat edib.
Sürücünün oğlu, Qaraağaclı qəsəbə sakini 2001-ci il təvəllüdlü Emin Behbudov müxtəlif dərəcədə bədən xəsarəti alıb. Yaralı xəstəxanaya yerləşdirilib. Vəziyyəti orta-ağırdır.
