Qafqazda ilk ürək transplantasiyası icra edilən şəxs insanlara donor olmaqla bağlı çağırış edib.
Report.аz xəbər verir ki, ürək transplantasiyası icra edilən pasiyent Rəşad Məmmədəliyev bu çağırışı "Qafqazda ilk ürək transplantasiyası: Azərbaycan səhiyyəsinin tarixi nailiyyəti və gələcək perspektivlər" mövzusunda keçirilən dəyirmi masada səsləndirib.
O, əməliyyatdan sonra səhhətinin yaxşı olduğunu vurğulayıb:
"Ürək transplantasiyası etdirməyə qorxsam da, həkimimə inanırdım. Əməliyyatdan öncə təngnəfəsliyim var idi, indi hər şey çox yaxşıdır. Artıq əməliyyatdan bir neçə ay keçib, normal həyatıma davam edirəm. Düzdür, əvvəl hərəkət etməkdə çətinlik çəkirdim, indi rahat hərəkət edirəm. Bir neçə dərman qəbul edirəm. Bəzisi ömürlük, bəziləri müddətlidir. Donor ailəsinə, üzərimdə əməyi olan hər kəsə təşəkkür edirəm. Transplantasiyanın mənə hər hansı psixoloji təsiri olmadı. Ümid edirəm ki, bütün xəstələr tezliklə şəfa tapar".
Xatırladaq ki, 2025-ci il oktyabrın 31-də Qafqaz regionunda ilk dəfə olaraq Azərbaycanda meyit donorun ürəyi transplantasiya edilib.
Qeyd edək ki, ürək transplantasiyası əməliyyatı Mərkəzi Klinikada baş həkim, professor Kamran Musayevin rəhbərlik etdiyi ixtisaslı tibbi heyət tərəfindən icra olunub. Meyit donorun ürəyi 2006-cı il təvəllüdlü Tovuz rayon sakini Rəşad Məmmədəliyevə köçürülüb.
