Gəncənin tam yaxınlığında olan iki kənddə əsas yolların işıqlandırılmaması sakinlər və sürücülər üçün ciddi təhlükə yaradır.
Gencexeber.az-ın məlumatına görə, Gəncə şəhəri ilə bitişməkdə olan Göygöl rayonunun Üçtəpə kəndinin əsas avtomobil yolundan hər gün yüzlərlə sürücü istifadə edir. Gəncə və Göygöl şəhərlərini bir-birinə birləşdirən bu yolun üzərində isə işıqlandırma sistemi yoxdur.
Sakinlərin sözlərinə görə, mövcud vəziyyət xüsusilə axşam saatlarından sonra daha təhlükəli hal alır. Qaranlıq səbəbindən həmin ərazidə dəfələrlə ağır yol-nəqliyyat hadisələri baş verib, hətta ölüm halları qeydə alınıb.
Məsələ ilə bağlı Üçtəpə bələdiyyəsindən şifahi olaraq bildirilib ki, problemin həlli üçün maliyyə vəsaitinə ehtiyac var. Qeyd olunub ki, yaxın müddətdə məsələ ilə bağlı müəyyən addımların atılması planlaşdırılır.
Oxşar vəziyyət Gəncəyə bitişən Göygöl rayonunun Quşqara kəndində də müşahidə olunur. Kənd Bakı–Qazax magistral yolunun üzərində yerləşir. Sakinlərin sözlərinə görə, sürətli hərəkət edən avtomobillər və yolun işıqlandırılmaması piyadalar üçün ciddi təhlükə yaradır.
Məsələ ilə bağlı Göygöl Rayon İcra Hakimiyyətinin nümayəndəliyindən bildirilib ki, problem barədə aidiyyəti qurumlara müraciət olunub.
Sakinlər isə ümid edirlər ki, verilən vədlər bu dəfə söz olaraq qalmayacaq və hər iki kənddə yolun işıqlandırılması təmin ediləcək. Bu isə həm sürücülərin, həm də piyadaların təhlükəsizliyi baxımından mühüm əhəmiyyət daşıyır.
