1998-ci il təvəllüdlü Cəlal bacısı Naziləyə (adlar şərtidir) xəsarət yetirib.
Demokrat.az xəbər verir ki, hadisə Samux rayonunun kəndlərinin birində baş verib. Cəlal yaşadığı evdə bacısı Nazilə ilə şəxsi münasibətlər zəminində mübahisə edərək dalaşıb və dava zamanı əlində olan taxta parçası ilə onun hər iki qollarına, hər iki bud və bədənin müxtəlif nahiyələrinə bir necə dəfə zərbə endirib.
Cəlalın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən Cəlal ona elan olunmuş ittiham üzrə özünü təqsirli bilib və ifadəsində göstərib ki, hadisədən 2-3 gün əvvəl Rusiyada yaşayan dayısı oğlu Əmrahla telefon danışığı zamanı bacısı Nazilə onun evdə səs-küy saldığını, ev əşyalarını satdığını və münaqişə yaratdığı barədə məlumat verib: "Bu səbəbdən Əmrah mənə öz iradını bildirdi. Əmrah məndən yaşca böyük olduğuna görə ona bir daha evdə münaqişə yaratmayacağım barədə söz verdim".
Təqsirləndirilən şəxs qeyd edib ki, daha sonra yaşadığı evdə olan zaman bacısı Nazilə və anası evə gəlib: "Anamdan nə üçün mənim qeybətimin aparılmasını soruşdum. Bacıma isə nə üçün barəmdə dayım arvadına söz dediyini irad bildirdim. Bacım isə dayım arvadına heç bir söz demədiyini söylədi. Bu zaman bacımın yalan danışmasına əsəbiləşdim və nə üçün evinin sirrini, söhbətimi kiminsə bilməsinə şərait yaratdığını dedim. Daha sonra yerdə olan taxta parçasını əlimə alaraq bacımın üstünə getdim, hər iki qollarına, ayaqlarına və bədəninin müxtəlif nahiyələrinə bir neçə dəfə vuraraq döydüm. ".
Cinayət işinə Samux Rayon Məhkəməsində baxılıb. Məhkəmədə məlum olub ki, təqsirləndirilən şəxs zərərçəkənlə barışıq əldə edib. Zərərçəkən də onu bağışlayıb, şikayətini geri götürüb. Məhkəmənin hökmü ilə Cinayət Məcəlləsinin 73.2-ci maddəsi tətbiq edilib və təqsirləndirilən şəxs cinayət məsuliyyətindən azad edilib. Onun barəsində olan cinayət təqibinə xitam verilib.
