Yeni tədris ilinin başlanması ərəfəsində Mingəçevirdə tələbələr üçün kirayə mənzillər tapılmır.
Teleqraf.аz-a daşınmaz əmlak üzrə mütəxəssis Saləddin Baxşəliyev vəziyyəti şərh edib.
Onun sözlərinə görə, hazırda Mingəçevirdə kirayə mənzillər sarıdan ciddi qıtlıq yaşanır.
Saləddin Baxşəliyev birotaqlı mənzilin aylıq ödəniş qiymətində ötən illə müqayisədə 50-70 manat arası bahalaşma olduğunu deyib:
"Əvvəllər 200-230 manata təklif olunan 1 otaqlı mənzil indi 300 manatadır. Həmin mənzildə 3 tələbə hərəyə 100 manat ödəməklə qala bilər".
Qeyd edək ki, Mingəçevir Dövlət Universiteti, Mingəçevir Turizm və Tibb Kollecinin yerləşdiyi bu şəhər həm də tələbə şəhəri kimi tanınır.
Saləddin Baxşəliyev deyir ki, Mingəçevirdə kirayə mənzillərə böyük ehtiyac var: "Şəhərin daşınmaz əmlak bazarında qiymətlər od tutub yanır".
