Daşkəsən rayonunda 20 yaşlı gənc marketdə iş yoldaşını qətlə yetirib.
Oxu.аz xəbər verir ki, hadisə rayon ərazisindəki "Dilqəm" marketdə baş verib. Həmin marketdə işləyən, 2005-ci il təvəllüdlü Sənan Şəfiyev mağaza rəhbərinin göstərişi ilə mağazanın vitrinlərinə məhsullar düzməklə məşğul olub. Bir müddətdən sonra mağaza müdiri onun maaşını artırıb və eyni zamanda o, kassir də işləyib.
Həmin vaxt marketdə digər satıcı, 1998-ci il təvəllüdlü Məhəbbət Hüseynov da işləyib və o da vaxtaşırı vitrinlərə nəzarət edib.
Bir gün Məhəbbət mağazanın Sənana aid hissəsindəki vitrinlərin düzülmədiyini görüb və həmin vitrinləri də özü düzüb. O, sonra həmin məsələyə görə Sənana irad tutub. Sənan isə həmin işin Məhəbbətə aid olduğunu deyib və aralarında mübahisə yaranıb. Məhəbbət Sənanı mağazadan çölə çağırıb və gəlməyəni söyüb. Bundan ardınca o, mağazadan dabankeşi götürərək Sənanı vurmaq istəyərkən qarşı tərəf marketdə yağ kəsmək üçün olan bıçağı götürərək Məhəbbətin üstünə gedib. O, Məhəbbəti ürəyindən bıçaqlayıb. Məhəbbətin yıxıldığını görən Sənan hadisə yerindən qaçıb.
Məhəbbət xəstəxanaya çatdırılsa da, onun həyatını xilas etmək mümkün olmayıb.
Polis əməkdaşlarının keçirdikləri əməliyyat tədbirləri nəticəsində Sənan saxlanılıb, məhkəmə qərarı ilə barəsində həbs qətimkan tədbiri seçilib.
Faktla bağlı cinayət işi başlanıb və iş Gəncə Ağır Cinayətlər Məhkəməsinə göndərilib. Məhkəmənin hökmü ilə S.Şəfiyev 12 il azadlıqdan məhrum edilib.
