Gəncədə gənclər üçün layihə keçirilib. Bu haqda Gencexeber.az-a 15 iyul tarixində məlumat daxil olub.
"Gələcəyə Körpü" Gənclər İctimai Birliyinin ev sahibliyi ilə “Qafqazı kəşf et - 10 il sonra: Qafqazda gənclər sektorunu araşdıran təhsil səfəri” layihəsi yekunlaşıb. Proyekt Almaniyanın Avropa Mədəniyyətlərarası Forumu təşkilatının Avropa Komissiyasının Erasmus+ proqramının maliyyə dəstəyi və "Gələcəyə Körpü" İB-nin təşkilatçılığı ilə icra edilib.
Layihə çərçivəsində 8-15 iyul tarixlərində Bakı və Gəncə şəhərlərində gənclər işi sahəsində fəaliyyət göstərən müxtəlif dövlət və qeyri-hökumət təşkilatlarına səfərlər olub, onların təcrübələri və fəaliyyət istiqamətləri əcnəbi gənclərə təqdim olunub. Təhsil səfəri müddətində müvafiq olaraq, Gənclər və İdman Nazirliyi, Gənclər Fondu, Gənclər Təşkilatları Milli Şurası (NAYORA), ASAN Gənclər Təşkilatı, Gəncə Gənclər evi, Gəncə Regional Qadın Mərkəzi, o cümlədən Bakı və Gəncədə fəaliyyət göstərən Qeyri-hökumət təşkilatlarına səfərlər həyata keçirilib, ölkəmizdə aparılan gənclər siyasəti və gənclər işi haqqında təqdimatlar və panel müzakirələri baş tutub.
Burada Azərbaycan, Türkiyə, Belarus, Bolqarıstan, Estoniya, Gürcüstan, Almaniya, Yunanıstan, Macarıstan, İtaliya, Litva, Moldova, Niderland Krallığı, İspaniya və Ukraynadan olan 28 nəfər gənc iştirak edib.
Layihənin məqsədi təhsil, iştirak və əməkdaşlığa, gənclər mərkəzli yanaşmaya fokuslanan, yerli və beynəlxalq gənclərin maraqları ilə idarə olunan, gənclərin rəhbərlik etdiyi icma inkişafı üçün transmilli tərəfdaşlıqları və beynəlxalq əməkdaşlığı təşviq etmək olub.
[modula id="40816"]
