Bu gün tanınmış gəncəli hüquqşünasın dünyaya göz açdığı gündür. Bu haqda Gencexeber.az 26 oktyabr tarixində xəbər verir.
Ukrayna Baş Prokurorunun sabiq müavini olan həmyerlimiz Gündüz Məmmədovun 49 yaşı tamam olur.
Hüquq elmləri namizədi dosent Ukraynanın Əməkdar hüquqşünası Gündüz Aydın oğlu Məmmədov 26 oktyabr 1974-cü ildə Gəncədə anadan olub. 1996-cı ildə “hüquqşünaslıq” ixtisası üzrə Meçnikov adına Odessa Milli Universitetini, 2013-cü ildə isə Odessa İqtisad Universitetini bitirib.
1996-cı ildə Ukrayna prokurorluğunda işləməyə başlayıb. O, prokuror köməkçisi kimi Odessanın Primorski rayonunun prokurorluğunda təcrübə keçib, sonra rayon prokurorunun birinci müavini olub. 2012-2013-cü illərdə Kiyev vilayətinin prokurorluğunda çalışıb. 2014-cü ilin iyulundan Odessa prokuroru, 2015-ci ilin dekabrından isə Odessa vilayəti prokurorunun müavini işləyib. 22 avqust 2016-cı ildən Krım Muxtar Respublikasının prokuroru olub.
Gündüz Məmmədov bir çox vəzifələrdə çalışdıqdan sonra 18 oktyabr 2019-cu ildən 27 iyul 2021-ci il tarixədək Ukrayna Baş prokurorunun müavini olaraq çalışıb. O, öz istəyi ilə ərizə yazaraq, Baş Prokurorluğu tərk edib.
