Gəncədə Fövqəladə Hallar Nazirliyinin növbəti tədbiri baş tutub. Bu haqda 14 oktyabr tarixində nazirliyə istinadən məlumat veririk.
FHN Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin təşkilatçılığı ilə “Texniki təhlükəsizlik bizim prioritetimizdir” mövzusunda seminar-müşavirə keçirib. Tədbirdə agentliyin məsul əməkdaşları, FHN-in Gəncə Regional Mərkəzinin əhatə etdiyi ərazidə fəaliyyət göstərən yerli icra hakimiyyətlərinin nümayəndələri, sənayenin müxtəlif sahələrində fəaliyyət göstərən iş adamları iştirak ediblər.
Agentliyin rəis müavini İsmayıl Nəsirov müəssisələrdə texniki təhlükəsizliyin təmin edilməsinin vacibliyini qeyd edib, bu sahədə qabaqlayıcı-profilaktik tədbirlərin görülməsinin zəruriliyini vurğulayıb. Burada, həmçinin sənayedə və dağ-mədən işlərində texniki təhlükəsizliklə bağlı mövcud problemlərdən söz açılıb, bədbəxt hadisələrin qarşısının vaxtında alınması üçün zəruri olan qabaqlayıcı-profilaktik tədbirlər barədə təkliflər səsləndirilib.
Daha sonra mövzu ətrafında geniş müzakirə aparılıb, suallar cavablandırılıb.
