Gəncədə taksi sürücüləri üçün təlimlər başlayıb. Bu haqda 14 oktyabr tarixində “Kəpəz” televiziyasına istinadən xəbər veririk.
Təlimlər iki qrup olmaqla ümumilikdə 50 nəfər sürücüyə keçirilir. Dərslərin məqsədi sürücülərin bilik və bacarıqlarının təkmilləşdirilməsi və xidmət səviyyəsinin yüksəldilməsi ilə vətəndaş məmnunluğunun artırılmasıdır. Sürücülərə, həmçinin sərnişindaşıma qaydaları, sürücü və sərnişinlərin hüquq və vəzifələri, nəqliyyat vasitələri, sürücülərə dair tələblər və etik davranış qaydaları aşılanır.
Məşğələlərdə iştirak üçün 11 minə yaxın sürücü müraciət edib. Proqramın yekununda imtahan təşkil olunacaq. Azərbaycan Yerüstü Nəqliyyat Agentliyinin mətbuat katibi Tural Orucov bildirib ki, dərsləri uğurla bitirən sürücülərə 7 il müddətinə şəhadətnamə təqdim ediləcək.
Proqrama qatılan sürücülər təlimdən məmnun olduqlarını deyiblər. Onlar, həmçinin taksi qiymətlərinin aşağı olmasından narahat olduqlarını bildiriblər. Sürücülər qiymətlərin qalxmasını xahiş edirlər.
