Gəncədə Türkiyə ilə əlaqədar tədbir keçirilib. Bu haqda 27 oktyabr tarixində İcra Hakimiyyətinə istinadən məlumat veririk.
Nizami yurdunda Türkiyə Cümhuriyyətinin 100 illiyi qeyd olunub. Silsilə tədbirlər çərçivəsində İcra Hakimiyyətinin dəstəyi, Türkiyənin Gəncədəki Baş Konsulluğunun və Gəncə-Daşkəsən Regional Təhsil İdarəsinin təşkilatçılığı ilə 28 nömrəli tam orta məktəbin həyətində ağacəkmə aksiyası baş tutub.
Burada icra başçısı Niyazi Bayramov, Türkiyənin Gəncədəki Baş konsulu Recep Öztop, Gəncə-Daşkəsən Regional Təhsil İdarəsinin müdiri Anar Qədiməliyev, İcra Hakimiyyəti başçısı aparatının məsul əməkdaşları, müəllim və şagird kollektivi iştirak ediblər. Ağacəkmə aksiyasında Heydər Əliyevin və Türkiyə Cümhuriyyətinin yaranmasının 100 illiyi ilə əlaqədar olaraq 100 ədəd ağac əkilib, onlara aqrotexniki qulluq göstərilib.
Sonra məktəbin kollektivi tərəfindən tədbirin bədii hissəsi keçirilib. Burada hər iki ölkənin ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib.
Tədbirdə Türkiyə Cümhuriyyətinin tarixi barədə çıxışlar dinlənilib. Məktəbəqədər təhsil müəssisələri, ümumtəhsil məktəbləri və məktəbdənkənar təhsil müəssisələrinin şagirdləri müxtəlif kompozisiyalarla çıxış ediblər.
