Gəncədə tələbələr üçün tədbir keçirilib. Bu haqda 6 dekabr tarixində GDU-ya istinadən məlumat veririk.
“Reproduktiv sağlamlıq və ailə planlaşdırılması” mövzusunda tədbir Nizami Bələdiyyəsinin Gender Əsaslı Komissiyasının təşkilatçılığı, İcra Hakimiyyətinin dəstəyi ilə Gəncə Dövlət Universitetində baş tutub. Burada universitetin Humanitar məsələlər üzrə prorektoru Gülsüm Fətəliyeva, Gender Əsaslı Komissiyanın sədri Leyla Məmmədova və İcra Hakimiyyətinin nümayəndəsi Xalidə Mete görüşün əhəmiyyətindən danışıblar.
Görüşdə qadın hüquqlarının müdafiəsi, qız uşaqlarının təhsildən yayındırılaraq erkən nikaha cəlb olunması, qadınlara qarşı hər cür zorakılıq və qısnamalarla mübarizə məsələlərindən bəhs edilib.
Beynəlxalq Xəstəxananın həkimləri Şəhla Verdiyeva və Aygün Altun erkən nikahların qızların reproduktiv sağlamlığına göstərdiyi mənfi təsirləri barədə geniş məlumat veriblər.
Sonda tələbələrin mövzu ətrafında sualları cavablandırılıb.
