Gəncədə bir sıra ərazilər su və kanalizasiya sistemləri ilə təchiz edilir. Bu haqda 13 oktyabr tarixində Kəpəz televiziyasına istinadən məlumat veririk.
Su-kanalizasiya layihəsinin icrasının ikinci mərhələsi yekunlaşmaq üzrədir. Bu etapda yeni kanalizasiya kollektorunun çəkilişi də nəzərdə tutulub. Artıq onun tikintisinə başlanılıb. Kollektor çirkab suların təmizləyici qurğuya axıdılmasını təmin edəcək.
Tullantı sularının təmizlənməsi üçün kollektor xətlərinin çəkilişinə bir ay öncə başlanıb. Bunun üçün ümumi uzunluğu 4 km olan dəmir-beton borular yerləşdirilib. Kollektor xətləri Samuxda inşa olunacaq tullantı sularının təmizlənməsi üçün qurğuya birləşdiriləcək. Avadanlıq sutkada 110 min kubmetr suyu təmizləmək gücünə malikdir.
İkinci mərhələ çərçivəsində ilin əvvəlindən indiyə kimi 600 abonentin evinə içməli su xətti çəkilərək sayğaclar quraşdırılıb. 500 abonentin kanalizasiya xətti əsas magistrala qoşulub.
