Gəncə şəhərinin Heydər Əliyev prospekti ilə Adil Babayev küçəsinin kəsişməsində antisanitariya vəziyyəti sakinlərin narazılığına səbəb olub.
Gencexeber.az-ın məlumatına görə, ərazidə yerləşən zibil qutuları ağzına qədər dolub və ətrafa üfunət yayılır. Küçə boyu dağılan tullantılar itlər tərəfindən daha da yayılaraq vəziyyəti dözülməz hala gətirib. Sakinlərin sözlərinə görə, günlərdir zibil qutularının boşaldılmaması həyat şəraitini xeyli çətinləşdirib.
“İtlər qutuları dağıdır, hər tərəf zibil içindədir. Nə nəfəs almaq olur, nə də küçədən keçmək. Havalar isindikcə bu vəziyyət daha da dözülməz olur,” – yerli sakin bildirib.
Onlar tərəfindən Mənzil Kommunal Təsərrüfatı İstehsalat Birliyinin (MKTİB) əraziyə baxış keçirmədiyi iddia olunur. Sakinlər aidiyyəti qurumlardan problemi dərhal aradan qaldırmağı tələb edirlər.
