Gəncədə Xan arxın natəmizliyi və üstünün açıq olması sakinləri narahat edir. Bu haqda 24 aprel tarixində Kəpəz televiziyasına istinadən xəbər veririk.
Antisanitar şəraitin yaranmasına və ətraf mühitin çirklənməsinə səbəb elə arxın ətrafında yaşayan sakinlərin arxı zibilləməsidir. Burada yaşayan əhali bildirir ki, kanalizasiya borusunu kanala qoşublar, iydən durmaq olmur. Yağış yağanda arx küçəyə daşır və evlərə tökülür.
Bundan əlavə, sakinlər axını sürətli olan su arxının üstünün açıq olmasının da təhlükə yaratdığını deyiblər. “Üstü bağlansaydı, yaxşı olardı. Uşaqlara görə çox narahatıq”, deyə onlar qeyd ediblər. Məsələ ilə bağlı Göygöl Suvarma Sistemləri İdarəsinin mühəndisi bildirib ki, binaların kanalizasiya borusu dağıdılıb və bu səbəbdən çirkab arxa tökülür. Layihədə nəzərdə tutulub ki, o hissə bağlanacaq, qapalı borudan keçəcək. Tədricən bu məsələ də həll olunacaq.
Mühəndisin sözlərinə görə, təmir və profilaktik tədbirlərə başlamaq üçün kanalda suyun axını dayandırılmalıdır. Bunun üçün 18 kilometrə yaxın olan kanal üzərindəki əkin sahələrinin mövsümi suvarılması başa çatdırılmalıdır.
