Gəncədə Kiçik və Orta Biznesin İnkişafı Mərkəzi (KOBİM) tərəfindən maarifləndirici tədbir təşkil olunub. Bu haqda 16 oktyabr tarixində mərkəzə istinadən xəbər veririk.
"Startaplarda və digər bizneslərdə sadələşdirilmiş vergi" mövzusunda təlim baş tutub. Burada 19 nəfər iştirak edib. Tədbirdə KOBİM-in eksperti mənfəət, əmlak, torpaq vergisi bəyannaməsinin doldurulması, oflayn rejimdə hazırlanmış bəyannamələrin təqdim edilməsi və sadələşdirilmiş vergi bəyannaməsinin onlayn qaydada doldurulması qaydaları barədə danışıb.
Həmçinin sahibkarlara sadələşdirilmiş vergi ödəyicisi olmaq hüququna malik olan vergi ödəyicisi, vergi dərəcələri, vergitutma obyekti, sadələşdirilmiş verginin hesablanması qaydası, ödəmə müddəti və bəyannamənin verilməsi, sadələşdirilmiş vergi ödəyiciləri üzrə azadolma və güzəştlərlə bağlı məlumat verilib.
Qeyd edək ki, qurum tərəfindən göstərilən bütün xidmətlər ödənişsizdir.
