Gəncədə ictimai nəqliyyatın cari vəziyyəti sakinləri narahat edir. Bu haqda 26 oktyabr tarixində ATV-yə istinadən məlumat veririk.
Vətəndaşların sözlərinə görə, qəsəbələrə marşrut xətləri üzrə az sayda avtobus buraxılır. Bu da nəqliyyat vasitəsində sıxlığa səbəb olur. Həmçinin onlar bəzi sürücülərin məsuliyyətsiz davranışlarından narazılıq edirlər.
“Bəziləri avtobusu yarış maşını kimi sürür, digərləri telefondan istifadə edir və fikri yayınır. Bu da qəzalara səbəb olur”, - deyə onlar qeyd ediblər.
Bundan başqa, 1 saylı avtobus marşrutlarının işlədiyi xətt üzrə cavabdeh olan şirkətə müraciət olunub. Bildirilib ki, burada nəqliyyat vasitələri nəqliyyat departamentinin rəyi ilə xəttə çıxır. Əsas yoxlanılan hissələrdən biri isə əyləc sistemi və işıqlardır.
Təhlükəsizlik üzrə mühəndis Mətləb Xəlilov bir neçə gün öncə baş verən qəza ilə bağlı açıqlama verib. Onun sözlərinə görə, çox güman ki, qəzaya avtobusun əyləc sistemində yaranan nasazlıq səbəb olub.
Gəncə şəhər Baş Polis İdarəsindən verilən məlumata əsasən, qəza ilə bağlı araşdırma aparılır. Artıq ilkin ehtimallar var.
Qeyd edək ki, sakinlər avtobusların köhnə və yararsız halda olmasından da narahat olduqlarını bildirirlər. Onlar şəhərə yeni və müasir ictimai nəqliyyatın gətirilməsini istəyirlər.
