Gəncə şəhər Mərkəzləşdirilmiş Kitabxana Sisteminin 15 saylı Kitabxana Filialında tədbir olub. Bu haqda 23 may tarixində Mərkəzləşdirilmiş Kitabxana Sisteminə istinadən xəbər veririk.
Tədbir Azərbaycan klassik ədəbiyyatının görkəmli nümayəndəsi Məhəmməd Füzulinin 530 illiyinin qeyd edilməsi ilə bağlı keçirilib. Burada dahi şairin həyat və yaradıcılığı haqqında məlumat verilib. 16 saylı tam orta məktəbin 7-ci sinif şagirdləri dahi şairin dillər əzbəri olan “Söz”, “Vətənimdir” və sair bu kimi qəzəllərini əzbər söyləyiblər. Sonra həmin məktəbin 3-cü sinif şagirdlərinin təqdimatında şairin "Meyvələrin söhbəti” alleqorik poemasının əsasında hazırlanmış nağıl-tamaşa nümayiş olunub.
“Qüdrətli Azərbaycan şairi Məhəmməd Füzuli-530” adlı tədbirdə qeyd edilib ki, oynanılan əsərdə hər bir meyvə özünün xüsusiyyətindən, faydasından danışaraq öyünür. Əslində dahi şair meyvələrin dili ilə nəsihətamiz sözlər deyir. Nəticə etibarı ilə məlum olur ki, hər bir meyvə faydalıdır, əvəzsizdir.
