Gəncədə konfrans keçirilib. Bu haqda 20 oktyabr tarixində İcra Hakimiyyətinə istinadən məlumat veririk.
“Qərbi Azərbaycan irsinin tanıdılmasında ulu öndər Heydər Əliyevin rolu” adlı elmi – praktiki konfrans Heydər Əliyev Mərkəzində təşkil olunub. Tədbir “Bakı Politoloqlar Klubu”nun Qeyri-Hökumət Təşkilatlarına Dövlət Dəstəyi Agentliyinin “Qərbi Azərbaycanlıların Qayıdış Konsepsiyası”nın icrasına ictimai dəstək güdən layihəsi çərçivəsində baş tutub. Konfrans İcra Hakimiyyətinin və Yeni Azərbaycan Partiyasının Gəncə şəhər təşkilatının dəstəyi və təşkilatçılığı ilə reallaşıb.
Burada icra başçısı Niyazi Bayramov, Bakı Politoloqlar Klubunun sədri Zaur Məmmədov, YAP Gəncə şəhər təşkilatının sədri Bayram Aslanov, millət vəkilləri Pərvin Kərimzadə, Musa Quliyev, GDU və ADAU-nun rektorları Yusif Yusifov və Zəfər Qurbanov, ATU-nun rektor əvəzi Yaşar Ömərov, Qərbi Azərbaycan İcmasının Gəncə təşkilatının rəhbəri Mübariz Yusifov, idarə, müəssisə, təşkilat rəhbərləri, şəhər ziyalıları və ictimaiyyət nümayəndələri iştirak ediblər.
Konfransda İlham Əliyevin Qərbi Azərbaycan siyasəti ilə bağlı videoçarx nümayiş olunub. Tədbirdə mövzu ətrafında çıxışlar baş tutub. Natiqlər Qərbi Azərbaycan irsinin tanıdılmasında Heydər Əliyevin fəalliyyətindən, Azərbaycan torpaqlarının qeyri-qanuni şəkildə ermənilərə verilməsindən, qayıdış prosesində Zəngəzur dəhlizinin əhəmiyyətindən danışıblar.
Burada, həmçinin “Qərbi Azərbaycan: tarixi-siyasi aspektlər” adlı məqalələr toplusu tədbir iştirakçılarına təqdim edilib.
