Gəncədə piyadalar velosipedçilərin hərəkətində çətinlik yaradırlar. Bu haqda 25 aprel tarixində Kəpəz televiziyasına istinadən məlumat veririk.
Son illər ərzində şəhərin bəzi hissələrində xüsusi velozolaqlar salınıb. Onlara Heydər Əliyev Parkı və Park-bulvar ərazisində rast gəlmək mümkündür. Lakin hərəkət iştirakçılarının təhlükəsizliyi məqsədilə yaradılan zolaqlar öz funksiyasını yerinə yetirə bilmir.
Velosipedçilər bildirirlər ki, sözügedən zolaqlardan əksər hallarda piyadalar istifadə edirlər. Bu da onlara çətinlik yaradır və narazılığa səbəb olur.
“Şəhərimizdə iki parkda velozolaqlar var. Lakin ora ilə daha çox piyadalar yürüş edir. İstərdik ki, bizdə də, Bakıdakı kimi küçələr boyunca zolaqlar ayrılsın, onlarda istifadə edək. Beləliklə də, nə avtomobillərə, nə də piyadalara maneə törətmərik”, - deyə velosipedçilər bildirirlər.
Məsələ ilə bağlı polisdən məlumat verilib ki, piyadaların velosiped zolağına daxil olması yolverilməzdir. Eyni zamanda avtomobil yollarında hərəkət edən velosipedçilərə də mütəmadi olaraq, maarifləndirici xəbərdarlıqlar edilir.
Bildirilir ki, yaxın illərdə şəhərimizdə avtomobil yollarında da velosiped zolaqlarının salınması gözlənilir. Bu isə velosipedçilərin təhlükəsiz, rahat hərəkətinə şərait yaratmaq, nəqliyyat sıxlığından əziyyət çəkən Gəncədə mikromobilliyi təmin etmək məqsədi daşıyır.
