Gəncədə millət vəkili ilə görüş baş tutub. Bu haqda 25 aprel tarixində İcra Hakimiyyətinə istinadən məlumat veririk.
Millət vəkili Pərvin Kərimzadə Uşaq Səfirlər Məclisinin Gəncə üzrə region nümayəndələri ilə görüşüb. Tədbir "Milli-mənəvi dəyərlərimizdən gələcəyə baxış" mövzusunda təşkil olunub. Burada İcra Hakimiyyətinin məsul əməkdaşı Xalidə Mete, Gəncə-Daşkəsən Regional Təhsil İdarəsinin sektor müdiri Nərgiz Həsənova, 4 nömrəli tam orta məktəbin direktoru Əliağa Səfərəliyev və başqaları iştirak ediblər.
Pərvin Kərimzadə Uşaq Səfirlər Məclisinin Gəncə üzrə region nümayəndələri və onlara dəstək üçün seçilən 21 fəal məktəblini salamlayıb və onlara arzularını çatdırıb.
Daha sonra mövzu ətrafında müzakirələr aparılıb, şagirdlərin sualları cavablandırılıb. Məktəblilər milli-mənəvi dəyərlərimizin yaşadılması və təbliği ilə bağlı öz təkliflərini səsləndiriblər.
