Gəncədə festival keçirilib. Bu haqda 15 iyul tarixində ASAN Radio-ya istinadən məlumat veririk.
Tədbir “Azerçay”ın təşkilatçılığı və İcra Hakimiyyətinin dəstəyi ilə “Bayraq meydanı”nda baş tutub. Festival üç gün davam edib. Burada çay ənənələrini əyani nümayiş etdirən guşələrlə yanaşı, dulusçuluq, toxuculuq kimi tarixi mədəniyyət nümunələrimizi təmsil edən müxtəlif maraqlı guşələr yaradılıb, əyləncəli proqramlar təşkil olunub. Festivalda həmçinin sakinlərə “Azerçay” markasının çayından dadmaq imkanı yaradılıb.
Sonda isə simvolik “Çay eksperti” sertifikatı təqdim edilib, balacaları sevindirmək üçün müxtəlif hədiyyələr təqdim olunub. Ziyarətçilər üçün müxtəlif oyunlar təşkil edilib və qaliblər mükafatlandırılıblar. Eyni zamanda lotereya oyunu keçirilib, qaliblər hədiyyələr qazanıblar.
Konsert proqramında Ədalət Şükürov, Ayaz Babayev, Elsevər Muradov, “East or West”, “Nənələr” qrupu və digər müxtəlif rəqs qruplarının çıxışları baş tutub.
Festival çərçivəsində Nizami yurdunda 8000 ailəyə “Azerçay” buket hədiyyə edilib.
