Gəncədə ağır yol-nəqliyyat hadisəsi baş verib. Hadisə nəticəsində 1988-ci il təvəllüdlü piyada Elvin Qurbanovu həyatını itirib. Araşdırma nəticəsində Gəncə sakininin həyatına son qoyan sürücünün yeniyetmə olduğu müəyyən edilib. Sürücü saxlanılıb, lakin yetkinlik yaşına çatmadığına görə barəsində həbs qətimkan tədbiri seçilməyib.
Maraqlıdır, bunun hüquqi tərəfi necədir? Hansı hallarda şəxs cinayət məsuliyyətinə cəlb edilmir?
Məsələ ilə bağlı Gencexeber.az-a açıqlama verən hüquqşünas Şamil Paşayev deyib ki, Cinayət Məcəlləsinin tələbinə görə Azərbaycan Respublikasında məsuliyyətə cəlb etməyə imkan verən yaş həddi 16-dır:
“16 yaşdan aşağı şəxslər məsuliyyətə cəlb edilmir. 14 yaşlı şəxslər isə qəsdən adam öldürmə, yolları yararsız vəziyyətə salma, adamları oğurlama, girov götürmə kimi hallarda müstəsna olaraq məsuliyyətə cəlb olunur. Bunlardan başqa hallarda əgər şəxs 16 yaşından kiçikdirsə, cinayət məsuliyyətinə cəlb edilmir. 16 yaşından yuxarı 18 yaşına çatmayan şəxslər barəsində isə həbs qətimkan tədbiri seçilməsində istintaq orqanı həssas yanaşmalıdır.
Bu şəxslərin ehtiyatsızlıqdan törədilən cinayətə görə barəsində ilkin dövr üçün həbs qətimkan tədbiri seçilməsi məqsədəuyğun hesab edilmir.
Cinayət prosessual məcəlləsinə əsasən, şəxslərin barəsində həbs qətimkan tədbiri seçilməsinin qaydası var. Şəxsin qaçıb gizlənməsi, istintaqa mane olması, istintaq orqanına gəlməməsi, sübutları saxtalaşdırmaq və bu kimi digər hallarda həbs qətimkan tədbiri seçilir. Bu kimi hallar yoxdursa, həbs qətimkan tədbirinin seçilməsinə gərək qalmır. İstənilən cinayətlə bağlı bu belədir. Xüsusilə yetkinlik yaşına çatmayan və ehtiyatsızlıqdan törədilən cinayətlərlə bağlı həbs qətimkan tədbirinin az seçilməsində fayda var”.
Əsmər Sənani
