Gəncədə hündür ağaclar sakinlər üçün təhlükə yaradır. Bu haqda 16 may tarixində Bizim.media-ya istinadən məlumat veririk.
Sözügedən hal şəhərin Mahrasa Bağı adlanan ərazisində - 13-cü binanın qarşısında müşahidə olunur. Ərazidə yaşayan sakin bildirir ki, burada 50-dən çox yaşı olan qovaq ağaclarının boyu binanın hündürlüyünü keçir:
“Güclü külək əsəndə qovaqlar hər dəqiqə qırılıb, kiməsə xələl yetirə bilər. Bir neçə gün əvvəl əsən güclü külək zamanı o ağaclardan birinin ən böyük budağı qırılıb, yerə düşdü. Şükür ki, həmin vaxt kimsə orada olmayıb. Qonşu avtomobilini həmişə o yerdə saxlayırdı. Xoşbəxtlikdən səhər tezdən işdə olduğundan orada maşın da yox idi. Yoxsa ziyan çox olardı”.
Sakinlər sözügedən dibi çürümüş qovaqların kəsilməsini istəyirlər.
Məsələ ilə bağlı 10 saylı Regional Ekologiya və Təbii Sərvətlər İdarəsindən bildirilib ki, qeyd olunan ünvandakı bitkilərə bir daha baxış keçiriləcək və yaxın günlərdə problem öz həllini tapacaq.
