Gəncədə Mahrasa bağının sakinlərini narahat edən məsələ yenidən gündəmə gəlib. Bu haqda Gencexeber.az-a 8 iyul tarixində məlumat daxil olub.
Bir neçə ay öncə Mahrasa bağı adlanan ərazidəki 10-cu binanın qarşısında uşaqlar üçün meydançanın sökülərək yerində hündürmərtəbəli binanın tikilməsinə hazırlıq işləri ilə bağlı xəbər paylaşmışdıq. Bu hal sakinlərin narazılığına səbəb olmuşdu.
Məsələ ilə bağlı İcra Hakimiyyətinə müraciət etmişdik. Oradan ərazinin heç kimə satılmadığı bildirilmişdi.
Bir neçə gün öncə sözügedən yerdə yenidən tikinti işlərinə hazırlığa başlanıb. Ərazidə texnika və canlı qüvvə çalışır. Sakinlər məsələ ilə bağlı narazı və narahat olduqlarını bildirirlər. Onlar hər hansısa tikilinin olmasını istəmədiklərini qeyd ediblər.
“Bir qadın əlində sənədlərlə gəlib deyir ki, buranı 200 000 manata satın alıb. Uşaqlarımızın oynadığı meydançanı söküb, qazıntı işləri aparırlar. Bundan başqa, xeyir-şər mağarını da sökməyə hazırlaşırlar. Bütün ətraf binaların sakinləri yığışıb, şikayətə çıxmışıq. Lakin həmin qadın etirazını bildirənlərə əl qaldırır və təhqir edir. Biz bu məsələnin həll olunmasını və uşaqlarımızın oyun ərazisinin bərpa edilməsini istəyirik”, - deyə sakinlər bildirirlər.
Məsələ ilə bağlı yenidən İcra Hakimiyyətinə müraciət etdik, lakin hələlik cavab ala bilməmişik.
