Gəncədə qəsəbə sakinləri uşaq meydançasının hasara alınması ilə bağlı narazılıq bildirirlər. Bu haqda Gencexeber.az-a 13 aprel tarixində məlumat daxil olub.
Söhbət şəhərin Mahrasa bağı adlanan ərazisində 10-cu binanın qarşısından gedir. Burada köhnə uşaq meydançası və stadionu yerləşir. Bu gün həmin yerə canlı qüvvə cəlb olunub və ərazidə yeni meydança salınacağı bildirilib. Lakin sakinlərin sözlərinə görə, burada torpaq satılıb və çoxmərtəbəli bina tikiləcək.
“Bizə dedilər ki, uşaq meydançası salınacaq. Amma biz öyrəndik ki, buranı satıblar və bina inşa edəcəklər. Burada uşaqlarımız üçün köhnə yelləncəklər və stadion var idi. Uşaqlarımız çıxıb oynayırdılar. Ağacları kəsməyə başlayırlar. Bəs biz, burada yaşayan insanlar nə etməliyik? Hara çıxıb istirahət edək? Uşaqlarımız harada oynasınlar? Biz bu tikintinin aparılmasına razı deyilik və olmaması üçün əlimizdən gələni edəsiyik”, – deyə burada yaşayan əhali bildirib.
Məsələ ilə bağlı İcra Hakimiyyətinə müraciət etdik. Oradan bildirildi ki, ərazi heç kimə satılmayıb:
“Gəncə Şəhər İcra Hakimiyyəti tərəfindən Mahrasa bağı ərazisində torpaq sahəsi ayrılmamış və hər-hansı bir tikintiyə icazə verilməmişdir”.
