Gəncədə seminar-treninq keçirilib. Bu haqda 28 oktyabr tarixində Dini qurumlarla iş üzrə dövlət komitəsinə istinadən xəbər veririk.
“Gənc nəslin milli-mənəvi dəyərlər ruhunda tərbiyəsi” mövzusunda ikigünlük seminar-treninq baş tutub. Tədbir məktəb direktorları, təlim-tərbiyə işləri üzrə direktor müavinləri, məktəb psixoloqları, həyat bilgisi, tarix, Azərbaycan dili və ədəbiyyat fənlərini tədris edən müəllimlər üçün təşkil edilib. Burada müəllimlər məktəbdə tədris etdikləri fənn çərçivəsində şagirdlərə milli-mənəvi dəyərlərin necə öyrədilməsi barədə təcrübə və təkliflərini bölüşüblər.
Seminarda Regional Təhsil İdarəsinin Gəncə şəhər təhsil sektorunun müdiri Nərgiz Həsənova , Dini Qurumlarla İş üzrə Dövlət Komitəsinın Dini təhsil şöbəsinin müdiri Elnarə Kərimova, Gəncə bölgəsi üzrə şöbənin müdiri Həsən Məmmədov, Azərbaycan İlahiyyat İnstitutunun İlahiyyat fakültəsinin dekanı Elnurə Əzizova iştirak ediblər.
Həmçinin gənc nəslin milli-mənəvi dəyərlər ruhunda tərbiyəsi üçün onlarla işin qurulması istiqamətləri, xüsusilə yuxarı sinif şagirdləri arasında bu dəyərlərin təbliğ olunması metodları, dinə aid mövzuların şagirdlərə çatdırılması üsulları və bu kimi digər mövzular haqda danışılıb.
Qeyd edək ki seminar-treninq DQİDK və Elm və Təhsil Nazirliyinin birgə təşkilatçılığı ilə baş tutub.
