Gəncədə bir sıra ərazilərdə piyadalar yolu keçməkdə çətinlik çəkirlər. Bu haqda Gencexeber.az-a 6 oktyabr tarixində məlumat daxil olub.
Bu hal şəhərin Nəriman Nərimanov prospekti və Atabəylər küçəsində müşahidə olunur. Sakinlər bildirirlər ki, sözügedən ərazilərdən birincisində piyadalar yolu keçən zaman təhlükə ilə üzləşirlər. Buna səbəb digər tərəfdən gələn nəqliyyat vasitəsini görməyin mümkün olmamasıdır.
Onlar çətinliyin aradan qalxması üçün müvafiq tədbirlərin görülməsini arzu edirlər.
Digər küçədə yerləşən “Uğur” aptekinin qarşısında isə piyada zolağı var. Lakin sakinlər sürücülərin yol nişanına məhəl qoymayaraq piyadalara yol vermədiklərini bildirirlər. Onlar qeyd ediblər ki, həmin ərazidə dəfələrlə məktəbliləri maşın vurub.
Sakinlər bu vəziyyətdən narahat olduqlarını deyirlər. Məktəblilərin valideynləri ərazidə işıqforun quraşdırılmasını istəyirlər.
