Gəncədə növbəti kommunal qəzalar baş verib. Bu haqda Gencexeber.az-a 19 oktyabr tarixində məlumat daxil olub.
Hadisə şəhərin Aida İmanquliyeva küçəsində qeydə alınıb. Ərazidə yerləşən kanalizasiya quyularından biri daşıb. Nəticədə küçə boyunca güclü axınla çirkab axmağa başlayıb.
“Üfunətli kanalizasiya suyu Dəmir Yolu Vağzalına kimi axıb gedir. Ümumiyyətlə, bu ərazidə tez-tez kommunal qəzalar baş verir. Bu xoşagəlməz məsələnin həll olunmasını istəyirik”, - deyə sakinlər bildiriblər.
Oxşar vəziyyət şəhərin Ağamirzə Əhmədov küçəsində də müşahidə olunur. Sakinlər bildirirlər ki, burada bir neçə gündür ki, küçə boyunca su axır. Nəticədə asfalt örtüyü olmayan avtomobil yolunda gölməçələr əmələ gəlib.
