Gəncədə iki universitetin tərəfdaşlığı ilə təlim baş tutub. Bu haqda 8 may tarixində Gəncə Dövlət Universitetinin İnnovasiyalar Departamentinə istinadən xəbər veririk.
Gəncə Dövlət Universitetinin tərəfdaşlığı və Azərbaycan Dövlət İqtisad Universitetinin koordinatorluğu ilə təlim həyata keçirilib. Tədbir “Azərbaycan Universitetlərində Yaşıl və Dayanıqlı Qlobal İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması” (REFRESH) layihəsi çərçivəsində olub. Burada universitetin fakültə dekanları, kafedra müdirləri və professor müəllim heyəti iştirak ediblər.
Tədbirdə iştirakçılara layihə çərçivəsində Danimarka Texniki Universitetinə edilən səfər haqqında məlumat verilib. Qeyd edilib ki, layihə çərçivəsində bəzi fənlərin sillabusları yenilənib. Layihənin xarici ekspertləri tərəfindən sillabuslara verilmiş rəylər və tövsiyələr iştirakçıların diqqətinə çatdırılıb. Sonra sillabuslarda olan təlim nəticələrinin təkmilləşməsi istiqamətində müzakirələr aparılıb.
