Gəncədə konfrans baş tutub. Bu haqda 31 oktyabr tarixində Şəhər Birləşmiş Xəstəxanasına istinadən xəbər veririk.
“II Beynəlxalq Qastroenteroloji və Cərrahiyyə Günləri” adlı konfrans keçirilib. Burada müxtəlif regionlardan və şəhərlərdən professor, həkim-mütəxəssislər, 200-ə yaxın qastroenteroloq, terapevt, cərrah, onkoloq iştirak edib. İki gün davam edən tədbirdə “Ezofaqus”, “Mədə”, “Öd yolları”, “Mədəaltı vəzi”, “Qaraciyər”, “Transplantologiya”, “Yoğun bağırsaq və düz bağırsaq xəstəlikləri”, “İnvaziv cərrahiyyə” adlı panellər və 40-a yaxın məruzə təqdim olunub.
Konfransda, həmçinin Şəhər Birləşmiş Xəstəxanasının direktoru İlkin İsmayılov, TƏBİB-nin icraçı direktoru Vüqar Qurbanov və şöbə müdiri Vüsal Yusifov, İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Yadigar Bədəlov, konfransın təşkilati sədri Fərid Quliyev və Türkiyənin Gəncədəki baş konsulu Recep Öztop iştirak ediblər.
Tədbir Səhiyyə Nazirliyi tərəfindən akkreditasiya olunub. Burada iştirak edən həkimlərə 13 kredit balı verilib, həmçinin məruzəçilərə və iştirakçılara sertifikatlar təqdim edilib. Konfrans Tibbi Ərazi Bölmələrini İdarəetmə Birliyinin dəstəyi, Şəhər Birləşmiş Xəstəxanasının və Azərbaycan Qastroenterologiya və Invaziv Endoskopiya Cəmiyyətinin təşkilatçılığı ilə baş tutub.
