Bu gün şəhid Vüqar Paşayevin doğum günüdür.
Vüqar Dilqəm oğlu Paşayev 20 iyun 1975-ci ildə Daşkəsən rayonunun Mollahəsənli kəndində anadan olub. 1992-ci ildə Mollahəsənli kənd orta məktəbini bitirib. Həmin il Azərbaycan Respublikası Hərbi Akademiyasına daxil olub.
1993-cü ildə Vətənin ağır günlərində Akademiyanın bir qrup müəllim və tələbələri ilə yanaşı, Vüqar da Qarabağ döyüş bölgəsinə yollanıb. Onlar bir neçə gün davam etmiş qızğın döyüşlərdə iştirak etdikdən sonra yenə təhsillərini davam etməyə qayıdıblar. 1994-cü ilin fevral ayında yenidən həmin heyət Murovdağda gedən döyüşə göndərilib.
Vüqar Dilqəm oğlu Paşayev qızğın döyüşlərin birində, 18 fevral 1994-cü il tarixində düşmən snayperinə tuş gələrək şəhidlik zirvəsinə ucalıb. O, 21 fevral 1994-cü ildə Gəncə şəhərinin Şəhidlər xiyabanında dəfn edilib.
