Bu gün şəhid Məmməd Abdullayev və Feliks Zakaryayevin doğum günüdür.
Məmməd Abbas oğlu Abdullayev 22 oktyabr 1961-ci ildə Gəncədə anadan olub. O, 6 saylı orta məktəbi bitirib. İnşaat texnikumunun məzunu olub. Alüminium zavodunda briqadir işləyib, Şəhər Sovetinin deputatı olub.
18 mart 1992-ci ildə könüllü olaraq cəbhəyə yollanıb. Goranboyun azad edilməsində iştirak edib. Daha sonra leytenant Gəncə batalyonunun tərkibində Ağdam cəbhəsinə yollanıb. Sarısu, Gülüstan kəndlərinin azad edilməsi uğrunda döyüşlərdə vuruşub.
Gənc zabit 22 iyunda Goranboydan Ağdərəyə yollanıb. Məmməd Abbas oğlu Abdullayev 29 iyun 1992-ci ildə Levonarx kəndində mühasirəyə düşən 27 nəfər döyüş dostunu xilas edərkən düşmən mərmisinin qəlpəsindən həlak olub.
Şəhidimiz Gəncə Şəhidlər xiyabanında dəfn olunub.
Feliks Nizaməddin oğlu Zakaryayev 22 oktyabr 1972-ci ildə Dağıstan Respublikasının Stalski rayonunda anadan olub. 6 yaşında anası ilə birlikdə Gəncəyə köçüb. Boksla məşğul olub, dəfələrlə şəhər yarışlarında qalib gəlib.
O, 1990-1992-ci illərdə Xarkov vilayətində həqiqi hərbi xidmətdə olub. Feliks könüllü olaraq cəbhəyə yollanıb. Ağdərə və Tərtər bölgələrində vuruşub.
Feliks Nizaməddin oğlu Zakaryayev 3 aprel 1993-cü ildə Kəlbəcər ətrafında gedən döyüşlərdə minaya düşüb. 18 gündən sonra isə şəhidlik zirvəsinə ucalıb.
