Bu gün şəhid İlqar Məhərrəmovun və Niyazi Qəribovun doğum günüdür.
İlqar Əbuzər oğlu Məhərrəmov 29 oktyabr 1965-ci ildə Gəncə şəhərində anadan olub. 8 nömrəli orta məktəbi bitirib. O, 1983-1985-ci illərdə Volqoqradda həqiqi hərbi xidmətdə olub. Avtomexanika Texnikumunda gözətçi işləyib.
İlqar 1991-ci ildə könüllü olaraq cəbhəyə yollanıb. Bir neçə döyüş əməliyyatında iştirak edib. Fəxri Fərmanla təltif olunub. Çaykənd, Sarısu, Todan, Ağdərə, Vəng və Drambon uğrunda gedən döyüşlərdə iştirak edib.
İlqar Abuzər oğlu Məhərrəmov 19 iyul 1993-ci ildə Muğanlı kəndi yaxınlığında şəhidlik zirvəsinə ucalıb.
Şəhidimiz Gəncə Şəhidlər xiyabanında dəfn olunub. Onun şərəfinə xatirə bulağı çəkilib.
Niyazi Tofiq oğlu Qəribov 29 oktyabr 1973-cü ildə Gəncədə anadan olub. 42 nömrəli orta məktəbi bitirib. 9 saylı texniki-peşə məktəbində avtomobil çilingəri peşəsinə yiyələnib.
Niyazi 19 iyul 1992-ci ildə hərbi xidmətə çağırılıb. O, Azərbaycanın Milli Qəhrəmanı Əlyar Əliyevin taborunun tərkibində Qubadlının müdafiəsində dayanıb.
Niyazi Tofiq oğlu Qəribov 18 dekabr 1992-ci ildə Zəngilanda gedən döyüşlərin birində şəhidlik zirvəsinə ucalıb.
