Gəncədə şəhid ailəsi ilə görüş baş tutub. Bu haqda 10 oktyabr tarixində Heydər Əliyev Mərkəzinə istinadən xəbər veririk.
16 nömrəli kitabxanada “Vətən üçün doğulanlar” mövzusunda şəhid Şahlar Nüsrət oğlu Nağıyevin ailəsi ilə görüş keçirilib. Tədbirdə şəhidin ailə üzvləri, təhsil aldığı 24 nömrəli tam orta məktəbin müəllim və şagirdləri, Vətən müharibəsinin qaziləri iştirak ediblər. Xatirə günündə şəhid haqqında hazırlanmış qısametrajlı film nümayiş olunub. Şagirdlər Vətən haqqında şeir kompozisiyası ilə çıxış ediblər.
Daha sonra şəhidin anası Gülzar Nağıyeva, qardaşı və həyat yoldaşı Şahlar haqqında xatirələrini danışıblar.
Tədbirdə, həmçinin Heydər Əliyev Mərkəzinin direktor əvəzi İlknur İsgəndərova, kitabxananın müdiri Mirvari Cəfərova, şəhidin döyüş yoldaşları - Vətən müharibəsinin qaziləri Fərid Xəlilov, Cəfər Məmmədov və tarix müəllimi Vüsalə Məmmədova iştirak ediblər. Onlar qəhrəmanlığı ilə vətənpərvərlik dərsi keçən Şahlar kimi oğulları heç vaxt unutmayacaqlarını və onlarla qürur duyduqlarını bildiriblər.
Görüşün sonunda şəhidin qızı Xədicə Nağıyeva şairə Esmira Günəşin atasına həsr etdiyi şeiri söyləyib.
Qeyd edək ki, tədbir 24 nömrəli tam orta məktəbin təşkilatçılığı ilə keçirilib.
[modula id="47651"]
