Gəncədə daha bir təmizlik aksiyası baş tutub. Bu haqda 4 noyabr tarixində İcra Hakimiyyətinə istinadən xəbər veririk.
Şəhərin müxtəlif ərazilərində geniş abadlıq-quruculuq, təmir-bərpa və təmizlik işləri həyata keçirilir. İşlər Mənzil Kommunal Təsərrüfatı İstehsalat Birliyi tərəfindən Zəfər Günü və Dövlət Bayrağı Günü ilə bağlı təşkil olunub. Ərazilərə qurumun canlı qüvvəsi və texnikaları cəlb edilib.
Beynəlxalq Hava Limanı və Gəncə-Bakı magistral yollarında, həmçinin şəhərin park və xiyabanlarında mövcud yaşıllıqlara aqrotexniki qulluq göstərilib, ağaclar suvarılıb, budama işləri aparılıb və yol kənarlarındakı haşiyələrin dağılıb tökülən plitələri yenilənib. Bununla yanaşı, Heydər Əliyev, Şah İsmayıl Xətai və Nizami Gəncəvi prospektlərində yerləşən işıq dirəkləri, yol nişanları, dayanacaqlar, zibil qutuları yuyulub, işıq dirəklərinə yeni boya vurulub, elektrik sistemindəki nasazlıqlar aradan qaldırılıb, nasaz lampalar və plafonlar yeniləri ilə əvəz edilib.
Həmçinin Gəncə-Bakı magistralının üzərində yerləşən “Xəmsə” Daş Kitabələr Kompleksində də təmir-bərpa işləri həyata keçirilir. Nizami Gəncəvinin beş əsərinə ucaldılan kitab-abidələr restavrasiya olunaraq, üzərinə boya çəkilib. Dahi mütəfəkkirin məqbərəsi ətrafındakı körpülərin alt və yan hissələrindəki plitələr bərpa olunub.
[modula id="49297"]
