Gəncədə erməni terroru zamanı həlak olanların xatirəsi anılıb. Bu haqda 11 oktyabr tarixində İcra Hakimiyyətinə istinadən məlumat veririk.
Bu gün şəhərimizin Ermənistan silahlı qüvvələri tərəfindən növbəti dəfə raket hücumuna məruz qalmasından üç il ötür. Bununla əlaqədar, icra başçısı Niyazi Bayramov, Türkiyənin Gəncədəki Baş konsulu Recep Öztop, millət vəkili Pərvin Kərimzadə, GDU-nun, ADAU-nun rektorları, ATU-nun rektor əvəzi, YAP Gəncə şəhər təşkilatının sədri, SHXÇDX Gəncə şəhər Nizami və Kəpəz rayonları şöbələrinin rəisləri, QMİ-nin Qazılar Şurasının üzvü, Aparatın məsul əməkdaşları, bələdiyyə sədrləri, şəhərdə fəaliyyət göstərən idarə, müəssisə, təşkilat rəhbərləri və şəhid ailələri Memorial Kompleksi ziyarət ediblər.
Onlar şəhid olan mülki vətəndaşların adlarının əks olunduğu lövhənin, həmçinin dağılan ərazinin önünə tər çiçəklər düzüblər. Şəhidlərin ruhuna dərin ehtiram ifadə olunub. Din xadimi şəhidlərimizin ruhlarına dualar oxuyub.
