Gəncədə hərəkətin sıx olduğu ərazilərdə qaraçılar sürücülər üçün ciddi təhlükə mənbəyinə çevriliblər.
Gencexeber.az-ın məlumatına görə, onlar nəqliyyatın intensiv hərəkət etdiyi prospekt və küçələrdə, xüsusilə işıqforlu yolayrıclarında avtomobillərə yaxınlaşaraq sürücüləri narahat edirlər. Qaraçılar bəzən yolun hərəkət hissəsinə daxil olaraq həm öz həyatlarını, həm də digər iştirakçıların təhlükəsizliyini riskə atırlar.
Təqdim etdiyimiz kadrlar Gəncənin Tağı Arani küçəsində, "İmperial" şadlıq sarayının qarşısında lentə alınıb. Görüntülərdən açıq şəkildə görünür ki, qaraçılar yolun ortasında dayanaraq nəqliyyat vasitələrinə yaxınlaşırlar. Sakinlərin sözlərinə görə, bu hallar nəqliyyatın hərəkətində ləngimələrə səbəb olur və qəza riski yaradır.
Vətəndaşlar aidiyyəti qurumlardan məsələ ilə bağlı ciddi tədbirlər görülməsini tələb edirlər.
Xatırladaq ki, ayın əvvəlində məhz bu ərazidə qaraçıların təhlükəli hərəkətləri ilə bağlı məsələni ictimaiyyətin diqqətinə çatdırmışdıq. Bundan sonra Gəncə Şəhər Baş Polis İdarəsinin əməkdaşları tərəfindən şəhər ərazisində avara və dilənçiliklə məşğul olan 23-dən çox şəxs müəyyən edilərək ərazi üzrə polis şöbəsinə gətirilib. Onlarla profilaktik söhbətlər aparıldıqdan sonra barələrində inzibati tədbirlər görülüb və qeydiyyatda olduqları şəhər və rayonlara göndəriliblər.
