Gəncədə sayğacların yenilənməsi işlərindən sonra cihazların kimə məxsus olduğu müəmmaya çevrilib.
Gencexeber.az-a daxil olan şikayətə əsasən, Gəncə şəhəri, Zülfü Hacıyev küçəsi, ev 16/15 ünvanında dünən, avqustun 7-si işıq sayğacları elektron qurğularla əvəz edilib. Lakin işlər bitdikdən sonra ciddi nöqsanlara yol verildiyi məlum olub. Sayğaclar kortəbii şəkildə quraşdırılıb və hansı sayğacın kimə məxsus olduğu dəqiq bilinmir.
Bu vəziyyət əhalinin fasiləsiz enerji təminatını təhlükə altına qoyub. Sayğacların üzərində mövcud olan 5 manatlıq kredit məbləği bitdikdən sonra, sakinlər yay aylarında işıqsız qalma riski ilə qarşı-qarşıyadır.
Sakinlər iddia edirlər ki, “Azərişıq” ASC-nin qaynar xətt nömrəsi ilə əlaqə saxlamaq mümkün olmur. “199” çağrı mərkəzi cavab vermir, digər əlaqə nömrələri isə işləmir.
Hazırda bu problem ilə bağlı heç bir tədbir görülməyib. Sakinlər sayğacların düzgün quraşdırılması üçün müvafiq qurumlardan təcili yardım gözləyirlər.
