Gəncədə fəaliyyət göstərən bəzi ictimai nəqliyyat vasitələrinin texniki vəziyyəti və sürücülərin davranışı narahatlıq doğurur.
Gencexeber.az-ın məlumatına görə, 17 nömrəli marşrut xətti üzrə hərəkət edən avtobusların birində oturacaqların böyük hissəsi məftillə bərkidilib. Bu, sərnişinlərin təhlükəsizliyi üçün ciddi risk yaradır.
20 nömrəli marşrut xəttinin avtobusunda isə sərnişinlərin bildirdiyinə görə, sürücü hərəkət zamanı mobil telefonla danışaraq qaydaları pozur. Avtobusun ümumi vəziyyəti isə qənaətbəxş deyil.
Bundan əlavə, 23 nömrəli marşrut üzrə hərəkət edən nəqliyyat vasitəsinin ön qapısının bağlanmadığı halda idarə edilməsi müşahidə olunub. Bu cür vəziyyətlər sərnişinlərin həyatı üçün təhlükə törədə bilər.
Sakinlər məsələ ilə bağlı aidiyyəti qurumlardan nəzarətin gücləndirilməsini və müvafiq tədbirlərin görülməsini tələb edirlər.
