Gəncə sakinləri plastik tullantıların yandırılmasından şikayətçidirlər.
Gencexeber.az-a daxil olan çoxsaylı müraciətlərə əsasən, Abbas Səhhət küçəsinin yaxınlığında yerləşən ərazidə hər gün təhlükəli və ekoloji cəhətdən zərərli proses həyata keçirilir.
Sakinlərin iddiasına görə, ərazidə metal tullantılar toplanaraq vaqonlara yığılır. Daha sonra isə xammal kimi daşınır. Ancaq bu prosesin ən narahatedici tərəfi, plastik örtüklərlə əhatələnmiş metal hissələrin yandırılaraq əridilməsidir. Nəticədə ətrafa yayılan qatı tüstü və kəskin plastik iyi insanlarda nəfəs darlığına səbəb olur, eyni zamanda bu zaman yaranan səs-küy ciddi narahatlıq yaradır.
Bütün bunlar adıçəkilən küçədə yerləşən aqlay sexinin arxasında, boş sahədə baş verir. Qeyd olunur ki, ərazidə hər gün eyni mənzərə yaşanır: metal tullantılar gətirilir, bəziləri yandırılır və emal edildikdən sonra vaqonlara yüklənir.
Sakinlər dəfələrlə bu fəaliyyətə etiraz etsələr də, yalnız qısa müddətə sakitliyi bərpa etmək mümkün olur. Vətəndaşlar artıq havanın çirklənməsi, səs-küy və sağlamlıqlarına vurulan zərərə görə ciddi narahatlıq keçirdiklərini bildirirlər.
Sakinlər məsələ ilə bağlı aidiyyəti qurumların təcili şəkildə tədbir görməsini, ərazidə nəzarətsiz və ekoloji normativlərə zidd fəaliyyətin qarşısının alınmasını tələb edirlər.
