Gəncədə tələbələr üçün ekskursiya təşkil olunub. Bu haqda 29 mart tarixində GDU-ya istinadən məlumat veririk.
Gəncə Dövlət Universiteti Tələbə Gənclər Təşkilatının təşkilatçılığı ilə Pedaqoji fakültənin bir qrup tələbəsi Azərbaycan Xalq Cümhuriyyəti Muzeyini ziyarət edib. Burada gənclərə Azərbaycan Xalq Cümhuriyyətinin xalqımızın dövlətçilik və ictimai-siyasi fikir tarixində rolundan bəhs olunub. Bildirilib ki, muzeyin eksponatları AXC-nin üç aylıq Gəncə dövrünü əhatə edir, Azərbaycanın ilk dövlət xəritəsi və İstiqlal bəyannaməsi burada qorunub saxlanılır.
Muzeydə sərgilənən həmin dövrə aid sənəd və materiallarla tanışlıq tələbələrin marağına səbəb olub.
