Gəncədə universitetlərdən birində müsabiqə təşkil olunub. Bu haqda 23 aprel tarixində GDU-ya istinadən məlumat veririk.
Gəncə Dövlət Universitetində Heydər Əliyevin anadan olmasının 101-ci ildönümünə həsr olunmuş bədii yaradıcılıq festivalının baxış müsabiqəsi keçirilib. Konsert proqramında tələbələr incəsənətin müxtəlif janrlarında öz istedadlarını nümayiş etdiriblər.
Müsabiqədə gənclərin vokal və instrumental, xor ifaçılığı, bədii qiraət və aşıq havalarını, xalq mahnılarını ifaetmə bacarıqları maraqla qarşılanıb.
Əməkdar incəsənət xadimi Baba Vəziroğlu tələbələrin təqdim etdiyi çıxışları yüksək qiymətləndirib, onların istedadının üzə çıxarılması üçün yaradılan əlverişli şəraitə, göstərilən diqqət və qayğıya görə universitet rəhbərliyinə təşəkkürünü bildirib.
Yaradıcılıq festivalının baxış müsabiqəsində istedadı ilə seçilən gənclər Bakıda keçiriləcək yekun konsertdə iştirak hüququ qazanıblar.
