Gəncə Dövlət Universitetinin Filologiya fakültəsində tədbir olub. Bu haqda 13 iyun tarixində GDU-ya istinadən xəbər veririk.
Təhsil ocağında “Bəşəriyyəti uçuruma aparan bəla” adlı tədbir keçirilib. Universitetin Humanitar məsələlər üzrə prorektoru Gülsüm Fətəliyeva tədbiri giriş sözü ilə açaraq bəşəriyyəti böyük təhlükə qarşısında qoyan narkomaniyanın zərərlərindən, pis vərdişlərin insan orqanizminə, sağlamlığına, eləcə də mənəviyyatına ağır zərbə vurmasından danışıb. Prorektor tələbələri sağlam həyat tərzi keçirməyə və zərərli vərdişlərdən uzaq olmağa çağırıb.
Tədbirdə Filologiya fakültəsinin dekanı Zakir Ələsgərov “Narkomaniya - dövrün faciəsi”, Filologiya fakültəsinin tələbələri – Naiq İsmayılov “Narkotik vasitələr və onun zərərləri”, Aysun Səfərova “Qadınlar narkomaniyanın tələsinə niyə düşür”, Jalə Cəfərova “Narkomaniyaya qarşı mübarizə” mövzularında çıxış ediblər. Onlar tələbələri narkomaniya əleyhinə maarifləndiriblər. Tədbirin sonunda tələbələrin sualları cavablandırılıb.
