Gəncədə pulsuz defektoloq konsultasiyası keçiriləcək.
Gencexeber.az məlumat verir ki, layihə Gəncə İnkişaf Təlim Tədris Mərkəzində baş tutacaq. Kəkələmə, psixi nitq inkişaf ləngiməsi, autizm, dislaliya, serebral iflic, daun sindromu, eləcə də digər nitq və psixoloji inkişaf problemləri ilə üzləşən hər kəs, yaşından asılı olmayaraq, ödənişsiz şəkildə müayinə olunacaq.
Konsultasiyalar 7-10 yanvar tarixlərində defektoloq-loqoped Aytac Əliyeva tərəfindən aparılacaq.
Sözügedən tibb ocağı Heydər Əliyev prospektində yerləşir (Qələbə Parkı ilə yanaşı). Maraqlanan şəxslər (055) 705 78 44 mobil telefonu vasitəsilə qəbula yazıla bilərlər.
Qeyd edək ki, adıçəkilən mütəxəssis bir müddət öncə Bakıda keçirilən “İlin uğuru” mükafatlandırma mərasimində peşəkar fəaliyyətində göstərdiyi yüksək nəticələrə görə nüfuzlu mükafata layiq görülmüşdü.
