Gəncədə universitetlərin birində iclas keçirilib. Bu haqda 2 may tarixində GDU-ya istinadən xəbər veririk.
Gəncə Dövlət Universitetində Elmi Şuranın növbəti iclası baş tutub. Burada rektor Yusif Yusibov “Heydər Əliyevin 100 illiyi (1923–2023)” yubiley medalı ilə təltif olunması münasibətilə Elmi Şura üzvləri tərəfindən təbrik edilib. İclasda uzunmüddətli səmərəli fəaliyyətinə görə və yubileyləri münasibəti ilə Alman dili kafedrasının baş müəllimi Vüsalə Kərimovaya, Təsviri incəsənət kafedrasının müdiri Mərdan Məmmədova, Bədən tərbiyəsi və idman kafedrasının baş müəllimi Tofiq Əliyevə universitet rektorunun imzaladığı fəxri fərmanlar təqdim olunub.
Həmçinin Ümumi riyaziyyat kafedrasının müəllimi Rza Ələsgərov riyaziyyat üzrə fəlsəfə doktoru elmi dərəcəsi alması münasibətilə təbrik edilib. Ağırlıqqaldırma üzrə dünya çempionu olmuş Pedaqoji fakültənin tələbəsi Orxan Mahmudov və ali təhsil müəssisələri tələbələri arasında keçirilən Respublika Çempionatında nailiyyətlərə görə klubun məşqçiləri və idmançı tələbələr rektorun əmri ilə Fəxri Fərman və mükafatla təltif olunublar.
Elmi Şuranın iclasında gizli səsvermənin nəticələri əsasında Riyazi analiz kafedrasının dosenti, riyaziyyat üzrə fəlsəfə doktoru, I Qarabağ müharibəsi veteranı Abbasov Zəfər Duman oğluna Gəncə Dövlət Universitetinin “Fəxri professoru” adının verilməsi məqsədəuyğun hesab edilib.
