"Gəncə və gəncəlilər" layihəsinin növbəti tədbiri keçirilib. Bu haqda 25 aprel tarixində Apa-ya istinadən xəbər veririk.
Layihə çərçivəsində Xalq artisti Fikrət Verdiyevin əziz xatirəsinə həsr olunmuş konsert proqramı baş tutub. Tədbir Fikrət Əmirov adına Gəncə Dövlət Filarmoniyasında təşkil olunub. Burada "Göygöl" Dövlət Mahnı və Rəqs Ansamblının müşayiəti ilə Xalq artistləri: Niyaməddin Musayev, Samir Cəfərov, Əməkdar artistlər: Ehtiram Hüseynov, Sevinc Sarıyeva, Əməkdar mədəniyyət işçisi Mehparə Cəfərova, Bakıdan dəvət olunmuş gənc ifaçılar: Səbinə Ərəbli, Kamilə Nəbiyeva, Mirələm Mirələmov, Anar Quliyev, Humay Qədimova, solistlər: Samir Məmmədov, Leyla Mehdiyeva, Çinarə İsgəndərova, Şirvan Cahangirov, Rövşən Məmmədov çıxış ediblər.
Gecədə "Zabul segah", "Bayatı şiraz", "Mahur təsnifi", "Dilkeş təsnifi", "Segah təsnifi", xalq mahnıları səsləndirilib. Sahil Quliyevin bədii rəhbərliyi, baletmeyster Sənan Cavadovun quruluşu ilə “Göygöl” Dövlət Mahnı və Rəqs Ansamblının çıxışları təqdim edilib. Həmçinin Fikrət Verdiyevin həyat və yaradıcılığından bəhs edən film, Xalq artisti haqqında deyilən fikirlərlə bağlı videoroliklər nümayiş etdirilib. Tədbirdə onun ailə üzvləri, ziyalılar, mədəniyyət və incəsənət xadimləri iştirak ediblər.
