Azərbaycanın ilk Ekoloji Park Kompleksi Gəncədə inşa olunur. Bu haqda 21 oktyabr tarixində MKTİB-yə istinadən məlumat veririk.
Burada artıq son tamamlama işləri aparılır. Park Gəncəçayın sağ sahilində yerləşir. Tikinti işlərinin bu ilin sonuna yekunlaşması planlaşdırılır. Buranın ümumi sahəsi 11 hektardır. Ərazidə 2100 kvadratmetr sahədə 3 mərtəbəli oranjereya binası yerləşir. Burada istənilən fəsildə müxtəlif nadir növ gül-çiçək, kol bitkiləri, eləcə də ağac tingləri yetişdiriləcək. Bunun üçün oranjereya binasının daxilində bitkilərin normal inkşafının təmin edilməsi üçün isitmə və havalandırma sistemi qurulur.
Ekoloji Park Kompleksinin ərazisində əyləncə mərkəzləri, idman qurğuları, iaşə obyektlərinin yerləşdirilməsi də planlaşdırılıb. Həmçinin müxtəlif növ balıqlar üçün açıq havada akvarium da olacaq.
Hazırda Ekoloji parkın ərazisində yeni yollar çəkilib, avtomobillər üçün dayanacaq salınıb, müasir işıqlandırma sistemi quraşdırılıb, müasir tələblərə uyğun yağış və damcı suvarma sistemləri ilə təchiz olunmuş istixanalar tikilib. Gülçülük sahəsindəki 11 hektar ərazi damcı-suvarma sistemi ilə təmin edilib. Ekoloji parkın Gəncə çayı tərəfindəki ərazisində 540 ədəd sərv ağacı əkilərək ərazi hasarlanıb, ətrafına isə mozaika daşları döşənib.
Girəcəkdə Ekoloji parkın rəmzi hesab olunan "zeytun ağacı insan ovucunda" abidəsi qoyulub.
[modula id="48373"]
