Bəzi vətəndaşlar tərəfindən tikinti, məişət və digər tullantılarla zibillənən daha bir ərazi Gəncə şəhər Mənzil Kommunal Təsərrüfatı İstehsalat Birliyinin canlı qüvvə və texnikası vasitəsilə təmizlənib. Bu haqda 13 iyun tarixində MKTİB-yə istinadən xəbər veririk.
Söhbət Gəncə Gömrük İdarəsinin yaxınlığında yerləşən və neftbaza kimi tanınan əraziyə gedən yolun sağ və sol hissəsindən gedir. Şəhərin kənar və nəzarətsiz bir yeri olduğu üçün əhali tərəfindən mütəmadi olaraq, çirklənməyə məruz qalan ərazidəki xoşagəlməz mənzərə, MKTİB-nin 5, 12, və 13 saylı ƏXS-nin əməkdaşları, həmçinin qurumun texnikaları vasitəsilə aradan qaldırılıb.
Adıçəkilən ərazinin ekoloji mühitinin çirklənməsinə və antisanitar vəziyyətə yol açan məişət və tikinti tullantıları bir yerə toplanaraq daşınması təmin edilib. Gəncə şəhər Mənzil Kommunal Təsərrüfatı İstehsalat Birliyi sakinlərdən bir daha xahiş edir ki, təmir-tikinti, məişət və digər tullantıları təyin olunan yerlərə atsınlar. Əks-təqdirdə bu vətəndaşlar aşkar olunduqca barələrində inzibati tədbirlər görüləcək.
