Bu gün Tehrandakı səfirliyimizə silahlı hücumda şəhid olan Orxan Əsgərovun dünyaya gəldiyi gündür.
Gencexeber.az məlumat verir ki, Azərbaycan Respublikasının İran İslam Respublikasındakı Səfirliyinin Mühafizə Xidmətinin rəisi olan Orxan Rizvan oğlu Əsgərov 1982-ci il noyabrın 5-də Gəncə şəhərində anadan olub.
1999-2003-cü illərdə Bakı Dövlət Universitetinin Beynəlxalq hüquq və beynəlxalq münasibətlər fakültəsində bakalavr, 2003-2005-ci illərdə həmin universitetdə magistr təhsili, 2005-2007-ci illərdə isə aspirantura təhsili alıb. 2014-2015-ci illərdə Rusiyada, 2015-2016-cı illərdə Ukraynada, 2016-2017-ci illərdə isə Gürcüstanda yerləşən Azərbaycan Respublikasının səfirliklərində hərbi diplomatik xidmət edib.
2018-ci ildə mühafizə xidmətinin rəisi vəzifəsinə yüksəlib və Türkiyənin İstanbul şəhərinə ezam olunub. 2021-ci ildən etibarən isə İranın Tehran şəhərində yerləşən Azərbaycanın səfirlik kompleksində hərbi diplomatik xidmətə başlayıb.
Orxan Əsgərov 27 yanvar 2023-cü il tarixində Azərbaycan Respublikasının İran İslam Respublikasındakı səfirliyinə silahlı hücum zamanı təxribatçının qarşısını alarkən qəhrəmancasına şəhid olub.
Orxan Əsgərov göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda" medalı ilə təltif edilib.
Ruhu şad olsun!
